Hillary Clinton po dëshmon në një seancë me dyer të mbyllura para ligjvënësve amerikanë lidhur me rastin e Jeffrey Epstein, ndërsa ka deklaruar se “nuk kishte asnjë ide” për krimet e tij dhe kërkoi që të merret në pyetje edhe presidenti Donald Trump, shkruan BBC.

Në deklaratën e saj hyrëse, të publikuar në rrjetet sociale, Clinton kërkoi që Komiteti i Kontrollit të Dhomës së Përfaqësuesve, i udhëhequr nga republikanët, të thërrasë për dëshmi edhe Trumpin. Ajo tha se nuk ka asnjë informacion për krimet e Epstein dhe nuk kujton të ketë takuar apo biseduar ndonjëherë me të.

Ligjvënësit pritet të japin përditësime për mediat gjatë ditës mbi dëshminë e saj. Nuk ka pretendime se përfshirja e një personi në dokumentet e Epstein, që përmbajnë miliona dosje, nënkupton domosdoshmërisht keqbërje.

Clinton akuzoi komitetin se po zhvillon “teatër politik partiak” dhe se po shmang hetimin e personave që shfaqen më shpesh në dosjet e rastit. Sipas saj, ajo po thirret për dëshmi edhe pse nuk ka pasur asnjë takim me Epstein dhe nuk ka pasur dijeni për aktivitetet e tij kriminale, duke shtuar se hetimi po përdoret për motive politike.

Në deklaratë thuhet se edhe ish-presidenti Bill Clinton do të dëshmojë të nesërmen. Ai ka pranuar se e njihte Epstein, por ka mohuar përfshirje në veprimet e tij.

Hetimi i Komitetit të Kontrollit të Dhomës së Përfaqësuesve fokusohet në mënyrën se si Epstein krijoi pasurinë, lidhjet e tij me figura të fuqishme dhe nëse ai mund të ketë vepruar si agjent i ndonjë qeverie. / Burimi: BBC

Ish-Sekretarja amerikane e Shtetit, Hillary Clinton, i përsëriti ligjvënësve në deklaratën e saj hapëse të enjten se nuk ka informacion për aktivitetet kriminale të Jeffrey Epstein dhe bashkëpunëtores së tij, Ghislaine Maxwell.

Ish-Zonja e Parë e SHBA-së gjithashtu i bëri thirrje Kongresit ta merrte në pyetje presidentin aktual, Donald Trump.

“Si çdo person i ndershëm, jam tmerruar nga ajo që kemi mësuar për krimet e tyre”, tha ajo për Epstein dhe Maxwell.

“Është e pabesueshme që Epstein fillimisht mori një ‘shuplakë’ në 2008, gjë që i lejoi të vazhdonte praktikat grabitqare për një dekadë tjetër”, shtoi 78-vjeçarja në deklaratën e publikuar në platformën X.

Clinton aktualisht po përballet me pyetjet e anëtarëve të Komitetit të Mbikëqyrjes së Dhomës së Përfaqësuesve në Chappaqua, New York.

Në deklaratën e saj, ajo akuzoi kryetarin republikan të panelit, James Comer, se po e shënjestronte për arsye politike dhe i kërkoi panelit ta pyeste Trumpin – i cili dikur ishte mik me Epstein – nën betim për njohuritë e tij rreth personit të dënuar për trafikim seksual të fëmijëve.

“Çfarë po mbahet pezull? Kush po mbrohet? Dhe pse ky mbulim?”, pyeti ajo, ndërsa bashkëshorti i saj, ish-presidenti amerikan Bill Clinton, do të dëshmojë të premten si pjesë e hetimit të Kongresit. /Telegrafi/